El bolashaǵynyń jarqyndyǵy jolynda ár qazaqstandyq  qoǵamda oryn alyp jatqan reformalardyń mánin jete túsinip, ony Otanymyzdyń damýyna júıeli túrde qoldana bilýi tıis. Osy oraıda Elbasy óz Joldaýynda «Rýhanı jańǵyrý» baǵdarlamasyna basa mańyz berýdi tapsyrdy. 

Ótken jyly qolǵa alynǵan osynaý bastamany ári qaraı jalǵastyryp qana qoımaı, onyń aıasyn jańa mazmunmen jáne baǵyttarmen tolyqtyrý qajettigin alǵa qoıýy quptarlyq. «Jastar men otbasy ınstıtýtyn keshendi qoldaý memlekettik saıasattyń basymdyǵyna aınalýǵa tıis. Jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerek» degen Nursultan Ábishulynyń tapsyrmasy otbasyndaǵy qundylyqtardy arttyrýǵa da ákelip tireledi.

Memleket basshysy aıtqandaı, eger jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy. Sondyqtan, kóne dáýirlerden bastaý alatyn, óziniń tarıhı tájirıbesinen, ıgi salt, izgi dástúrlerinen múldem qol úzgen qoǵamda jańǵyrý nemese jańarý múmkin emes. Halqymyzdyń osyndaı tamyry tereńge ketken, tarıhymen birge jalǵasyp kele jatqan rýhanı baılyqtarynyń biri – otbasy qundylyqtary. Tipti bizdiń rýhanı qundylyqtarymyzdyń negizi de osy otbasylyq dástúrimizde jatyr emes pe?! Olaı bolsa, ár adam óz januıasyndaǵy bala tárbıesine erekshe den qoıyp, olardyń sanaly da, bilimdi azamat bolyp qalyptasýyna jaǵdaı jasaýda boılaryna ulttyq qundylyqtarymyzdy qatar sińirtýi qajet-aq.

«Yntymaqty eldiń yrysy mol» demekshi, táýelsiz elde birligimiz ben yntymaǵymyzdy saqtasaq, bizdiń alar asýlarymyz búgingiden de bıik bolary sózsiz. Osynaý jaıttardy ár otbasynda bala sanasyna sińirýge ár ata-ana úles qosýy mańyzdy. Joldaýda aıtylǵan bul sózderge jaı ǵana kóz júgirtpeı, astaryna zere sala úńilýdiń máni bólek. Olaı bolsa, ár  urpaqtyń sanasyna týyp ósken jeriniń tarıhyn sińirip otyrý –januıadaǵy úlkenderdiń mindeti. Osy oraıda «Mereıli otbasy» ulttyq baıqaýynyń jeńimpazy retinde aıtarym, ár bala atanyń qany men ananyń sútimen keletin týabitti qasıetter  sekildi ulttyq rýhanı qundylyqtardy da eń aldymen otbasynda ata-ananyń tárbıesimen boıyna sińiretini anyq.